संसद्मा सरकारविरुद्ध विपक्षी मोर्चा कडा बनाउने तयारी

सरकारको कार्यशैलीप्रति असन्तुष्टि जनाउँदै प्रतिनिधि सभाका प्रमुख विपक्षी दलहरूले संसद्मा थप सशक्त रूपमा प्रस्तुत हुने तयारी गरेका छन्। आइतबार भएको विपक्षी दलका प्रमुख सचेतकहरूको छलफलले जेठ १२ गते बस्ने प्रतिनिधि सभा बैठकमा सरकारको कडा प्रतिरोध गर्ने निष्कर्ष निकालेको हो।

सिंहदरबारस्थित एमाले संसदीय दलको कार्यालयमा भएको छलफलमा नेपाली कांग्रेस, नेकपा (एमाले), नेकपा र राष्ट्रिय प्रजातन्त्र पार्टी (राप्रपा)का प्रमुख सचेतकहरू सहभागी भएका थिए। एमाले प्रमुख सचेतक ऐनबहादुर महरले सरकारले संसदीय मूल्य–मान्यता विपरीत विपक्षीको आवाज दबाउने र पेलेर अघि बढ्ने प्रयास गरेको भन्दै त्यसविरुद्ध एकीकृत रूपमा उभिने सहमति भएको नागरिकलाई जानकारी दिए।