आइतबार शैक्षिक संस्था बन्द गर्ने निर्णयप्रति मेयर्स फोरमको आपत्ति

काठमाडौँ । केन्द्र सरकारले आइतबार शैक्षिक संस्था बन्द गर्ने निर्णय गरेर स्थानीय तहको संवैधानिक तथा कानूनी अधिकार कुण्ठित गरेको उपत्यका मेयर्स फोरमले बताएको छ। ललितपुरस्थित महालक्ष्मी नगरपालिकामा बसेको फोरमको बैठकले सरकारको यो कदम संविधान विपरीत रहेको निष्कर्ष निकाल्दै उक्त निर्णय तत्काल फिर्ता लिन माग गरेको छ।

मेयर्स फोरमका अध्यक्ष एवं ललितपुर महानगरपालिकाका मेयर चिरिबाबु महर्जनले केन्द्र सरकारको निर्णयप्रति कडा असन्तुष्टि जनाउँदै आवश्यक परे कानूनी प्रक्रियामा जाने चेतावनीसमेत दिएका छन्। शिक्षा ऐनअनुसार विद्यालय वर्षमा २ सय २० दिन सञ्चालन हुनुपर्ने व्यवस्था छ। तर, सरकारले अप्रत्याशित रूपमा आइतबार पनि बिदा दिने निर्णय गर्दा अध्ययन–अध्यापन प्रभावित भई विद्यालयहरू १ सय ९० दिन पनि सञ्चालन गर्न कठिन हुने अवस्था देखिएको महर्जनले बताए।