किसानलाई २४ अर्ब अनुदान वितरण: कृषि उत्पादन ज्यूँका त्यूँ

सरकारले कृषि क्षेत्रको उत्पादन र उत्पादकत्व बढाउन यो वर्ष करिब सवा २४ अर्ब रुपैयाँ अनुदान वितरण गरेको छ। चालु आर्थिक वर्ष २०८२/८३ मा कृषि अनुदान शीर्षकमा ३७ अर्ब ३१ करोड रुपैयाँ विनियोजन गरिएको थियो। अनुदान वितरण गरे पनि अपेक्षाकृत कृषिजन्य वस्तुको उत्पादन बढ्न सकेको छैन। मुलुकमा आवश्यकता अनुसार कृषिवस्तुको उत्पादन नहुँदा खर्बौं रुपैयाँका कृषिजन्य वस्तु विदेशबाट आयात हुने गरेका छन्।

संघीय सरकारले चालु आर्थिक वर्ष २०८२/८३ मा कृषि क्षेत्रका लागि विनियोजन गरेको अनुदान बजेटमध्ये फागुन मसान्तसम्म ६४.९ प्रतिशत मात्रै खर्च भएको अर्थ मन्त्रालयले जनाएको छ। फागुनसम्म २४ अर्ब २२ करोड रुपैयाँ खर्च भएको हो। सरकारले अनुदान वितरण गरे पनि उत्पादन ज्यूका त्यूँ छ।