विपद्ले निम्त्याउँदैछ अर्बौंको क्षति, तर पूर्वतयारीमा सरकारको बेवास्ता

काठमाडौँ । नेपालको विशिष्ट भौगोलिक अवस्थिति, कमजोर पहाडी भू–बनोट र जलवायु परिवर्तनको चरम असरका कारण विगत चार वर्षयता प्राकृतिक विपद्का दृष्टिले देश अत्यन्त चुनौतीपूर्ण र विनाशकारी अवस्थाबाट गुज्रिरहेको छ। यस अवधिमा मुलुकले केवल मौसमी उतारचढाव मात्र होइन, ऐतिहासिक रूपमै ठूला बाढी, पहिरो, भूकम्प र हिमनदीजन्य विपद्हरूको सामना गरेको छ।

मध्य नेपालको रोशी खोलामा आएको विनाशकारी बाढीले बीपी राजमार्ग तहसनहस बनाएको घटनादेखि दोधारा–चाँदनीमा अत्यधिक वर्षा हुँदा पनि पूर्वसूचना प्रणालीका कारण मानवीय क्षति न्यून भएको दृष्टान्त हाम्रा सामु छन्। यी घटनाले पूर्वतयारी र संरचनागत सबलीकरणको महत्त्वलाई स्पष्ट रूपमा देखाए पनि राष्ट्रिय नीति तथा बजेट निर्माणको प्रक्रियामा अझै पनि जलवायुजन्य विपद् जोखिम न्यूनीकरणलाई पर्याप्त प्राथमिकता दिन नसकिएको सरोकारवालाहरू बताउँछन्।