आईजीपीको चित्त दुखाउने सांसद खगेन्द्र सुनारको त्यो बोली, अनि भयो लेखा समितिमा चर्काचर्की...

बुधबार सार्वजनिक लेखा समितिको बैठक सत्तारुढ दल रास्वपाका सांसद खगेन्द्र सुनारले बहिष्कार गरेर हिँडे । निर्वाचन प्रहरीका लागि आवश्यक पोशाक खरिद गर्दा ६० करोडभन्दा बढी हिनामिना भएको भन्दै समितिमा उजुरी परेको थियो । समितिमा बेनामे उजुरी परेपछि समितिले छलफल गर्न गृहमन्त्री सुधन गुरुङ, गृहसचिव राजकुमार श्रेष्ठ, नेपाल प्रहरीको महानिरीक्षक दानबहादुर कार्की, सशस्त्र प्रहरीका महानिरीक्षक नारायण दत्त पौडेललाई छलफलका लागि बोलाइएको थियो ।

मन्त्री गुरुङलाई पनि बोलाएकोमा उनी भने अनुपस्थित भएका थिए । सचिव श्रेष्ठ र महानिरीक्षकद्वय कार्की र पौडेलले पोशाक खरिदमा आफ्नोतर्फबाट अनियमितता नभएको दाबी गरे । उनीहरू दुवै जनाले यसपालि संगठित रूपमा पोशाक नकिनेर सम्बन्धित निर्वाचन प्रहरीकै खातामा पैसा पठाएर किन्न लगाएको बताए । ‘यसपालि प्रचलित कानुनबमोजिम पोशाक खरिद गरिएको होइन । छोटो समय भएकाले सोझै निर्वाचन प्रहरीको खातामा नै पैसा पठाएर उनीहरूलाई नै किन्न लगाएको हो । खरिद उनीहरू र व्यापारीबीच हो । त्यसमा प्रहरीको संलग्नता नै थिएन,’ प्रहरी महानिरीक्षक कार्कीले भने ।