नेपालमा कम्युनिस्ट जनमतको ओरालो स्थिति

नेपालमा अनौपचारिक रुपमा राजनीतिक दल वा संगठन खोल्ने क्रममा इतिहासले झन्डै एक शताब्दीको उकालो यात्रा चढ्दै छ । देशमा राणाशासन प्रारम्भ भएको ८५ वर्षपछि वि.सं. १९८८ मा सामाजिक एवं राजनीतिक चेतनाका अगुवा खड्गमान सिंहको नेतृत्वमा भूमिगतरुपमा प्रचण्ड गोर्खा नामक राजनीतिक दलको स्थापना भएको थियो ।

नेपालमा यो नै अघोषितरुपमा खोलिएको पहिलो राजनीतिक संगठन थियो, तर प्रचण्ड गोर्खाका सदस्यहरुमाथि राणाहरुले दमनको नीति अवलम्बन गरेपछि यो संगठन अघि बढ्न सकेन । पाँच वर्षपछि यसैको जगमा टङ्कप्रसाद आचार्यको नेतृत्वमा १९९३ सालमा नेपाल प्रजा परिषद्को स्थापना भयो, जसले १९९७ सालको दुःखद घटनामा चेतनाको मियो बनेर तत्कालीन समाजमा उभियो । यही राजनीतिक दलको नेतृत्वमा ९७ सालको काण्डमा ४ जना नेपाली सपुतहरुले प्रजातन्त्रको पक्षमा जीवन बलिदान गरे । यस्तै हृदयविदारक घटनाको जगमा २००७ सालको जनक्रान्तिले महत्व र सफलता पाएको हो ।