व्यवसायीले निकुञ्जकसँग मागे हात्तीलाई घाँस

चितवनको सौराहामा निजी क्षेत्रबाट पालिएका हात्तीका लागि चितवन राष्ट्रिय निकुञ्जभित्रको घाँस उपलब्ध गराउन व्यवसायीले माग गरेका छन्। निकुञ्जभित्र खेर जाने घाँस निश्चित क्षेत्रमा काटेर ल्याउन दिए निजी हात्तीको व्यवस्थापन सहज हुने उनीहरूको भनाइ छ।

१५औं अन्तर्राष्ट्रिय हात्ती दिवसका अवसरमा आयोजित कार्यक्रममा युनाइटेड हात्ती सञ्चालन सहकारी संस्थाका अध्यक्ष दीपेन्द्र खतिवडाले निजी हात्तीका लागि चरिचरणको व्यवस्था गर्न माग गरे। धान, पराल लगायतका खाना दिने गरिए पनि हरियो घाँस सहज रूपमा उपलब्ध हुन नसकेको उनले बताए। ‘निजी हात्तीलाई चरिचरणको क्षेत्र कम छ। हाम्रा हात्तीले पेटभरि हरिया घाँस खान पाएका छैनन्,’ उनले भने, ‘राज्यले निश्चित रकममा खेर जाने घाँस काट्न दिने नियम बनाउनुपर्दछ।’