‘मृत्युपछि अंगदान गर्न धर्मले बाधा गर्दैन’

२८ साउन, काठमाडौं । मृत्युपछि गरिने अंगदानका लागि धर्मशास्त्रमा कुनै बाधा नरहेको धार्मिक अगुवाहरूले बताएका छन् । विश्व अंगदान दिवस २०२६ का अवसरमा स्वास्थ्य अभियान नेपालले बिहीबार छलफल कार्यक्रम आयोजना गरेको थियो । उक्त छलफलमा सहभागी भएका बौद्ध, हिन्दु र मुस्लिम धर्मका अगुवाले अंगदानमा कुनै धार्मिक बाधा नरहेको स्पष्ट पारेका हुन् ।

हिन्दु धर्मका गुरु चिन्तामणि योगीले धार्मिक कारण अंगदान गर्न मिल्दैन भन्ने कुरा हिन्दु धर्मका कुनै शास्त्रमा नभएको उल्लेख गरे । कसैको जीवन बचाउन गरिने अंगदान ठूलो पुन्यको काम भएको योगीले बताए । अहिले अंगदान गर्दा अर्को जन्ममा त्यो अंगबिनै जन्मिनुपर्छ भन्ने कुरा पनि कतै नभएको उनले स्पष्ट पारे ।