कांग्रेसमा सुदृढ एकता र युवा नेतृत्व अपरिहार्य:  विश्वप्रकाश शर्मा

काठमाडौँ। नेपाली कांग्रेसका उपसभापति विश्वप्रकाश शर्माले मुलुकको लोकतान्त्रिक प्रणालीलाई बलियो बनाउन र समृद्धिको यात्रालाई गति दिन पार्टीभित्र सुदृढ एकता आवश्यक रहेको बताएका छन्।

शुक्रवार ललितपुरको सानेपास्थित पार्टी केन्द्रीय कार्यालयमा आयोजित केन्द्रीय कार्यसम्पादन समितिको बैठकमा बोल्दै उनले पार्टीको आन्तरिक सुदृढीकरण नै देशको मुख्य आवश्यकता भएको उल्लेख गरे। पार्टीभित्र देखिएका प्रतिकूलता र भिन्न मतका बीच पनि सबैलाई समेटेर एकताबद्ध भएर अगाडि बढ्नुपर्नेमा उनको जोड थियो। विशेष महाधिवेशनबाट व्यक्त भएको कार्यकर्ताको भावना र दृढताकै जगमा आगामी दिनमा कांग्रेस अझ बलियो भएर जाने विश्वास व्यक्त गर्दै उनले व्यक्तिभन्दा संस्था र सिद्धान्तप्रतिको निष्ठा सधैँ माथि हुने बताए।