माछापुच्छ्रे बैंकको नाफा १२ प्रतिशत बढ्यो

काठमाडौं- माछापुच्छ्रे बैंक लिमिटेडले आर्थिक वर्ष २०८२/८३ को चौथो त्रैमाससम्मको वित्तीय विवरण सार्वजनिक गर्दै आफ्नो व्यवसाय र नाफामा उल्लेख्य सुधार भएको जनाएको छ । बैंकले सार्वजनिक गरेको प्रतिवेदन अनुसार समीक्षा अवधिमा बैंकको खुद नाफा १२.२३ प्रतिशतले बढेर २ अर्ब ११ करोड ४१ लाख रुपैयाँ पुगेको छ ।

अघिल्लो आर्थिक वर्षको सोही अवधिमा बैंकले १ अर्ब ८८ करोड ३६ लाख रुपैयाँ खुद नाफा आर्जन गरेको थियो । बैंकको निक्षेप संकलन र कर्जा प्रवाहमा पनि अघिल्लो वर्षको तुलनामा उत्साहजनक वृद्धि देखिएको छ । बैंकले असार मसान्तसम्ममा २ खर्ब २० अर्ब ४९ करोड ८४ लाख रुपैयाँ निक्षेप संकलन गरेको छ, जुन अघिल्लो वर्षको १ खर्ब ८४ अर्ब १७ करोड ६० लाख रुपैयाँको तुलनामा १९.७२ प्रतिशतको वृद्धि हो ।