नेपाली कांग्रेस, संस्था र मर्यादाको प्रश्न

राजनीतिक नेतृत्वको हरेक काम–क्रियाकलापमा पार्टीप्रतिको निष्ठा, इमानदारी र विधिवादिता देखिन जरुरी छ। राजनीतिक दल केवल नेताहरूको जमघट होइन। कार्यकर्ताको लामो पंक्ति दलसँग आस्था र आशा बोकेर बसेका हुन्छन्। दल एउटा संस्था हो। संस्थाको आफ्नै विधान हुन्छ, वैधानिक नेतृत्व हुन्छ, निर्णय प्रक्रिया हुन्छ र नेतृत्व परिवर्तनको आफ्नै लोकतान्त्रिक विधि हुन्छ। त्यसैले कुनै नेता कति पुरानो, कति शक्तिशाली वा कति लामो समय सभापति भयो भन्ने प्रश्न महत्त्वपूर्ण भए पनि अन्तिम प्रश्न त्यो होइन। अन्तिम प्रश्न हो, संस्थाको निर्णय र संस्थागत वैधतालाई उसले कति सम्मान गर्छ।

नेपाली कांग्रेसभित्र विशेष महाधिवेशनमार्फत नेतृत्व परिवर्तनको प्रक्रिया अगाडि बढ्यो। विशेष महाधिवेशनबाट गगन थापा नेतृत्वमा आए, यो तात्कालिक रूपमा सबै पक्षले स्वीकार गरेको कुरा हो। तत्कालीन सभापति शेरबहादुर देउवाले समेत चुनाव लड्ने इच्छा जाहेर गरेको र आफ्ना नजिकका नेताहरूलाई टिकट दिन अनुरोध गरेको कुरा आएको थियो। अहिले नेपाली कांग्रेसको अफिसियल वेबसाइटले थापालाई सभापति तथा देउवालाई पूर्वसभापति भनेर अभिलेख गरेको छ। यहीँबाट एउटा गम्भीर राजनीतिक प्रश्न उठ्छ, पूर्वसभापतिको सम्मान र पार्टीको आधिकारिक नेतृत्वको मर्यादा कसरी सँगसँगै जोगाउने?