अस्पतालमा सेवाग्राहीको भिड : गुणस्तरीय सेवामा चुनौती

काठमाडौं महानगरपालिका–२७ को टेबहालमा सहरी स्वास्थ्य प्रवर्द्धन केन्द्र अर्थात् प्रथम बिन्दु अस्पताल सञ्चालनमा छ। अस्पतालले उच्च रक्तचाप, मधुमेहदेखि ९८ प्रकारका औषधि वितरण गर्नुका साथै ल्याब परीक्षण, फिजियोथेरापी र अन्य सेवा प्रदान गर्दै आएको छ। तर घनाबस्ती रहेको यस वडाको तुलनामा अस्पतालमा सेवा लिन आउनेको संख्या भने अत्यन्त न्यून छ। केन्द्रमा स्वास्थ्य बिमा लागु भएपछि चिकित्सकहरू बिरामी जाँच्नभन्दा पनि रेफर गर्ने काममै व्यस्त हुनुपर्ने अवस्था आएको छ।

अस्पतालकी सूचना अधिकारी मनीषा श्रेष्ठका अनुसार पछिल्लो समय वीर अस्पतालमा उपचारका लागि जाने बिरामीलाई सिधै रेफर गर्नमै समय बित्ने गरेको छ। दैनिक आउने बिरामीमध्ये करिब ६० प्रतिशत स्वास्थ्य बिमाको रेफरल लिन मात्र आउने गरेको उनले बताइन्। ‘सेवाग्राहीले स्वास्थ्य परीक्षण नगरी सिधै रेफर माग्नुहुन्छ,’ उनले भनिन्। यसअघि उक्त केन्द्रमा दैनिक ४०–५० जना बिरामी आउने गरेका थिए। नियमित सेवा लिन आउनेमा उच्च रक्तचाप र मधुमेहका बिरामी बढी छन्।