विपद् व्यवस्थापनमा तथ्यांक बढ्दै, जोखिम घटाउने नीति खोइ ?

वैशाखयता नेपालमा विपद्का घटनाले जुन भयावह तस्वीर देखाएको छ, त्यसलाई केवल प्राकृतिक विपत्तिको परिणाम भनेर पन्छाउन मिल्दैन । गत वैशाख १ देखि साउन २८ गतेसम्म ४ हजार ६०८ विपद्का घटना हुनु, २१५ जनाको मृत्यु हुनु र १५ जना बेपत्ता हुनु आफैंमा गम्भीर राष्ट्रिय चेतावनी हो । राष्ट्रिय विपद् जोखिम न्यूनीकरण तथा व्यवस्थापन प्राधिकरणको तथ्यांकले विपद् नेपालका लागि मौसमी समस्या मात्र नभई निरन्तर बढिरहेको राष्ट्रिय जोखिम भएको देखाउँछ ।

यस अवधिमा ५ हजार ६३८ परिवार प्रभावित भएका छन् । अझ चिन्ताजनक कुरा, विपद्का घटनामा १ हजार ४२२ जना प्रभावित भएको तथ्यांकले राज्यको तयारी, पूर्वसूचना र उद्धार क्षमतामाथि गम्भीर प्रश्न उठाउँछ । तथ्यांक आफैंमा ठूलो समस्या होइन, तर हरेक वर्ष यस्तै तथ्यांक दोहोरिँदा पनि जोखिम न्यूनीकरणका क्षेत्रमा अपेक्षित सुधार नहुनु ठूलो कमजोरी हो ।