रजिस्ट्रारको योग्यता खुकुलो पार्दै कर्णाली स्वास्थ्य विज्ञान प्रतिष्ठानले फेर्‍यो कार्यविधि

काठमाडौँ । जुम्लास्थित कर्णाली स्वास्थ्य विज्ञान प्रतिष्ठानमा पदाधिकारी छनौट तथा सिफारिस सम्बन्धी नयाँ कार्यविधि जारी भएको दुई दिन नबित्दै संशोधन गरिएको छ । प्रतिष्ठानले साउन २७ गते सार्वजनिक गरेको कार्यविधिमा साउन २९ गते नै प्रथम संशोधन गर्दै महत्त्वपूर्ण प्रावधानहरू फेरबदल गरेको हो ।

शिक्षाध्यक्ष (रजिस्ट्रार बाहेकका अन्य पदाधिकारी), डीन र निर्देशकको शैक्षणिक तथा व्यावसायिक योग्यतालाई यथावत् वा स्पष्ट पारिए पनि विशेष गरी रजिस्ट्रार पदको शैक्षिक योग्यतामा हेरफेर गरिएको छ । पहिलो कार्यविधिमा निश्चित प्राविधिक तथा व्यवस्थापकीय विषयहरू तोकिएकोमा संशोधन मार्फत जुनसुकै विषयमा स्नातकोत्तर उत्तीर्ण गरेका व्यक्ति पनि रजिस्ट्रार पदका लागि योग्य हुने व्यवस्था गरिएको छ ।