भारतको स्वतन्त्रता संग्राममा गोर्खाहरूको योगदान

भारतको स्वतन्त्रता संग्रामको चर्चा गर्दा महात्मा गान्धी, सुभाषचन्द्र बोस, भगतसिंहसहित असङ्ख्य राष्ट्रिय वीरहरूको नाम हाम्रो स्मरणमा आउँछ। यस महान् स्वतन्त्रता आन्दोलनको एउटा महत्त्वपूर्ण अध्याय अझै पर्याप्त रूपमा चर्चामा आएको छैन : भारतका नेपालीभाषी गोर्खाहरूको योगदान।

ब्रिटिस भारतको इतिहासमा गोर्खाहरूलाई प्रायः ब्रिटिस भारतीय सेनामा सेवा गर्ने सैनिकका रूपमा मात्र चित्रित गरिन्छ। यो इतिहासको एउटा पक्ष मात्र हो। ब्रिटिस सेनामा सेवा गर्ने गोर्खाहरूसँगै धेरै नेपालीभाषी गोर्खाहरूले भारतीय राष्ट्रिय कांग्रेस, गान्धीवादी आन्दोलन, असहयोग आन्दोलन, सविनय अवज्ञा आन्दोलन, भारत छोडो आन्दोलन तथा भारतीय राष्ट्रिय सेना (आईएनए) मा सक्रिय सहभागिता जनाएका थिए।