बजेट घोषणाको मुखैमा सुदूरपश्चिम सरकारका मन्त्री फेरबदलः बजेटमा कस्तो पर्ला असर ?

धनगढी । सुदूरपश्चिम प्रदेश सभाको दोस्रो कार्यकालमा सरकार परिवर्तन र मन्त्री फेरबदलको विषय सामान्यजस्तै भइसकेको छ । प्रदेश सभाको दोस्रो कार्यकालमा चार वटा सरकार गठन भइसकेका छन् भने बहालवाला मुख्यमन्त्री कमलबहादुर शाह दोस्रो पटक कार्यभार सम्हालिरहेका छन् ।

मुख्यमन्त्री शाहले दोस्रो पटक सरकारको नेतृत्व गरिरहँदा पटक–पटक मन्त्रिपरिषद् विस्तार तथा फेरबदल गरेका छन् । ‘सरकारमा मन्त्री आउने-जाने हुनु स्वाभाविक हो । यसमा अचम्म मान्नुपर्ने केही छैन,’ मुख्यमन्त्री शाहले भने ।