खेलकुद पद वितरण विवाद : छानबिनलाई प्रभावित पार्न गण्डकी खेलकुद परिषद्का सदस्य सचिव सक्रिय

गण्डकी खेलकुद परिषद् (गखेप) को पद वितरणमा भएको अनियमितताको छानबिनलाई प्रभावित पार्न गण्डकी खेलकुद परिषद्का सदस्य सचिव श्रीधर शर्मा सक्रिय भएका छन्। मन्त्रीस्तरीय निर्णयका आधारमा गत साउन २४ गते गठन भएको सामाजिक विकास, युवा तथा खेलकुद मन्त्रालयका सचिव डा.शेषनारायण पौडेल नेतृत्वको तीन सदस्यीय छानबिन समितिले पद वितरणको समग्र अवस्थाबारे छानबिन गरिरहेको बेला सदस्य सचिव शर्मा छानबिन प्रभावित पार्न लागिपरेका हुन्।

पहिलो पटक दिइएको साउन २९ गतेसम्मको समयावधिमा छानबिन नसकिएपछि तीन दिन थपेर गण्डकी खेलकुद परिषद्का कार्यकारिणी सदस्यहरूसँग बयान लिने क्रम चलिरहेका बेला सदस्य सचिव शर्माले चलखेल सुरु गरेका छन्। उनले बयानमा जाने सदस्यहरूलाई आफूलाई बचाउने गरी बयान दिन आग्रह गर्दै फोन र म्यासेज गरेको पाइएको छ। फोनमार्फत आफूलाई फसाउने गरी बयान नदिन आग्रह गरेका एक सदस्यले जानकारी दिए।