कांग्रेसमा ‘इतर’ पनि छैन एकमत: मञ्चमै देखिएको ट्रेलरको संकेत के ?

नेपाली कांग्रेसमा अहिले देखिएको संकट संस्थापन र इतर पक्षबीचको मात्र होइन, एउटै समूहभित्र रहेका नेताहरूको आपसी अविश्वास, नेतृत्वको आकांक्षा र राजनीतिक एजेन्डाको टकरावसम्म पुगेको संकट हो। यसको पछिल्लो दृश्य संस्थापनइतर पक्षले आयोजना गरेको राष्ट्रिय भेलाको समापनमा देखियो । जहाँ सभापति गगन थापाविरुद्ध एउटै स्वरमा प्रस्तुत हुन खोजेको समूहकै दुई प्रभावशाली नेता विमलेन्द्र निधि र प्रकाशशरण महत मञ्चमै प्रस्तावको भाषामाथि भिडे।

यो सामान्य शब्दको विवाद थिएन। प्रस्तावमा धर्मसम्बन्धी शब्दावलीदेखि १४औँ महाधिवेशनबाट निर्वाचित कार्यसमितिको निरन्तरतासम्मका विषयमा देखिएको असहमति कांग्रेसभित्रको गहिरो वैचारिक र शक्ति-संघर्षको संकेत हो।