दुई दिनमै १६ हजार ग्यास सिलिन्डर बाँडियो, आजदेखि बिक्रेताले नै बेच्ने

नेपाल आयल निगमले शनिबार र आइतबार मात्रै काठमाडौं उपत्यकाका विभिन्न स्थानबाट १६ हजार ३०० भन्दा बढी सिलिन्डर ग्यास बिक्री वितरण गरेको छ। यससँगै आज (सोमबार) देखि भने सम्बन्धित ग्यास उद्योगहरूद्वारा नियुक्त गरिएका आधिकारिक बिक्रेतामार्फत नै ग्यास बिक्रीवितरण हुने व्यवस्था मिलाइएको निगमले जनाएको छ।

निगमले उपभोक्ताहरूलाई आफूलाई पायक पर्ने सम्बन्धित ग्यास बिक्रेताकहाँ सम्पर्क गरी ग्यास खरिद गर्न आग्रह गरेको छ। पछिल्लो चार महिनासम्म आधा सिलिन्डर ग्यास बिक्री वितरणको व्यवस्था गरिएकोमा गत असार ३१ देखि पुनः १४.२ किलोकै पूरा सिलिन्डर ग्यास उपलब्ध गराउन थालिएपछि बजारमा एकाएक ग्यासको अभाव देखापरेको थियो।