सर्वोच्चको पुनरावलोकन फैसलाले कांग्रेसको महाधिवेशन नरोकिने, प्रक्रिया रोक्ने पदाधिकारीलाई हटाउने सभापति थापाको चेतावनी

काठमाडौं । नेपाली कांग्रेसको यसअघि तोकिएको आगामी असोज १६ देखि १९ सम्म हुने १५ औँ महाधिवेशनको प्रक्रिया नरोकिने भएको छ । सभापति गगन थापाले सर्वोच्च अदालतले पार्टीको विवादमा यसअघिको फैसलामाथि पुनरावलोकन फैसला गरे पनि आधिकारिकताबारे केही नबोलेको भन्दै महाधिवेशन नरोकिने बताएका छन् । सोमबार पार्टीको केन्द्रीय समिति बैठक सकिएपछि गरेको सम्बोधनमा आगामी असोज १६ गते महाधिवेशन हुने बताएका हुन् । थापाले महाधिवेशनको प्रक्रिया भदौ २ गते नै सुरु हुनेसमेत बताए ।

सभापति थापाले भने, ‘पार्टीको विधान र संविधानको व्यवस्थाको विषय पनि छ । महाधिवेशन असोज १६ गते सुरु हुन्छ ।’ थापाले इतरपक्षको भेलामा केही जिल्ला सभापति र क्षेत्रीय सभापति सहभागी भएको जानकारी आफूले पाएको भन्दै विरोध र असहमति राख्न पाइने तर अधिवेशन रोक्न नपाइने बताएका छन् । उनले भने, ‘विरोध वा असहमति राख्न पाइन्छ । तर कुनै पनि जिल्ला सभापति, क्षेत्रीय सभापति, स्थानीय तह सभापति र वडा सभापतिले अधिवेशनको प्रक्रिया रोक्छु भन्न पाउँदैन । यदि रोक्नुभयो भने अर्कोलाई जिम्मेवारी दिनुपर्ने हुन्छ ।’