खाद्य पदार्थ किन्दा बिल लिनुहोस्, स्वास्थ्य र अधिकार दुवै जोगाउनुहोस्

हामी बजारबाट खाद्यान्न किन्छौं, होटलमा खाना खान्छौं, रेस्टुरेन्टबाट खाना घर लैजान्छौं वा अनलाइनबाट खाद्य पदार्थ मगाउँछौं। सामानको गुणस्तर, मूल्य र म्याद हेर्ने गरे पनि बिल माग्ने कुरालाई भने धेरैले प्राथमिकता दिँदैनौं। ‘सानो रकम हो’, ‘बिल चाहिँदैन’, ‘खाने कुराबाट के पो हुन्छ र’ भन्ने सोच सामान्य छ। तर खाद्य पदार्थको हकमा बिल लिनु केवल आर्थिक कारोबारको प्रमाण राख्नु होइन; यो उपभोक्ताको स्वास्थ्य र खाद्य सुरक्षासँग सम्बन्धित एउटा महत्वपूर्ण व्यवहार हो।

नेपाल सरकारले हालै करदाता प्रोत्साहन उपहार कार्यक्रम २०८३ सञ्चालनमा ल्याएको छ। कार्यक्रमको उद्देश्य वास्तविक बिल/बीजक लिने बानी विकास गर्नु, कारोबारलाई पारदर्शी बनाउनु र कर कानुनको परिपालना बढाउनु हो। खाद्य पदार्थ पनि यस कार्यक्रममा समेटिएको छ। त्यसैले यो अवसरलाई बिल माग्ने बानी विकास गर्ने माध्यमका रूपमा लिन सकिन्छ। तर यसको महत्व पुरस्कार वा कर संकलनभन्दा धेरै फराकिलो छ।