गुरुकुल : पाठशालाभन्दा परको जीवनदर्शन

गुरुकुल केवल अक्षर चिनाउने पाठशाला होइन, जीवन चिनाउने संस्कारभूमि हो । गुरुकुलमा शिक्षा केवल मस्तिष्कमा सञ्चित हुने सूचना होइन, आचरणमा प्रतिफलित हुने प्रज्ञा हो । त्यहाँ विद्याको अर्थ केवल परीक्षा उत्तीर्ण गर्नु होइन, विनय, विवेक, अनुशासन, आत्मसंयम, कर्तव्यबोध र लोकमङ्गलको चेतनासहित जीवनलाई सार्थक बनाउनु हो ।

यही सनातन शैक्षिक दर्शनलाई आधुनिक परिवेशमा जीवन्त बनाउने दूरदर्शी प्रयत्नका रूपमा महेश संस्कृत गुरुकुलको इतिहासलाई हेर्न सकिन्छ । ब्रह्मलीन स्वामी डा. रामानन्द गिरिको तप, त्याग, सङ्कल्प र साधनाबाट वि.सं. २०५० मा महेश सन्न्यास आश्रमको स्थापना भयो र २०५२ देखि देवघाटधाममा महेश संस्कृत गुरुकुलम् तथा महेश संस्कृत विद्यापीठको शैक्षिक यात्रा प्रारम्भ भयो ।