२०औं एसियाडमा नेपाली करातेको स्वर्ण चुम्ने संकल्प

एसियाली खेलकुदको विशाल मञ्चमा जब–जब नेपाली झण्डा फहराउँछ, तब–तब करातेको म्याटबाट एउटा छुट्टै ऊर्जा, आत्मसम्मान र आशाको सञ्चार हुने गर्छ । सन् १९९४ को हिरोसिमा एसियाली खेलकुददेखि सुरु भएको नेपाली करातेको ३१ वर्षे यात्रा केवल खेलकुदको इतिहास मात्र होइन । पसिना, समर्पण र सीमित स्रोतसाधनका बाबजुद विश्व मानचित्रमा नेपालको अस्तित्व दर्शाउने संघर्षको यात्रा पनि हो । सीताकुमारी राईले दिलाएको पहिलो ऐतिहासिक कांस्य पदकबाट सुरु भएको यो गौरवशाली यात्रा १९९८ मा सम्बरबहादुर गोले, २०१४ मा विमला तामाङ हुँदै २०२३ को हान्चाउ एसियाली खेलकुदमा एरिका गुरुङले जितेको ऐतिहासिक रजत पदकसम्म आइपुग्दा अझ परिपक्व र महत्वाकांक्षी बनेको छ । इतिहासको यही बलियो जगमा उभिएर अब नेपाली कराते टोली जापानको आइची नागोयामा हुने २०औँ एसियाली खेलकुदमा केवल सहभागिता वा कांश्य र रजत पदकका लागि मात्र होइन, देशको खेलकुद इतिहासमै पहिलोपटक स्वर्ण पदक चुम्दै दोहोरो पदकको इतिहास रच्ने दृढ संकल्पका साथ मैदानमा उत्रिने तयारीमा छ ।

राष्ट्रिय खेलकुद परिषद् (राखेप) को ‘मिसन–२०२६’ को मेरुदण्डका रूपमा हेरिएको करातेबाट यसपटक सातवटा विभिन्न स्पर्धामा आठ जना होनहार नेपाली खेलाडीहरूले देशको प्रतिनिधित्व गर्दैछन् । कुमुते (फाइट) तर्फ पुरुष वर्गमा आफ्नो तौल समूहको तिखो चुनौती प्रस्तुत गर्न ५० केजीमुनि राकेश मानन्धर, ५५ केजीमुनि मिनबहादुर तामाङ र ८४ केजीमाथि तेन्जिङ शेर्पा अहोरात्र पसिना बगाइरहेका छन् । त्यस्तै, महिलातर्फ ६८ केजीमुनि निरुपा दोङ तामाङ र देशकै ढुकढुकी बनेकी ६८ केजीमाथि एरिका गुरुङको मुक्का र किकले एसियाली म्याटमा नेपालको स्तर अझै उचाईमा पु¥याउने अपेक्षा गरिएको छ । कातातर्फ भने सानुमाया थिङले व्यक्तिगत र टिम दुवै विधामा सम्भावनाको नयाँ क्षितिज उघार्दै छिन् भने एलिशा रासकोटी मगर र मेघा लिम्बुले टिम कातामा आफ्नो कौशल देखाउनेछिन् । विशेष कुरा त के छ भने, एसियाली खेलकुदको इतिहासमै नेपालले पहिलोपटक महिला टिम कातामा सहभागिता जनाउँदै नयाँ अध्यायको श्रीगणेश गर्दैछ ।