इरानले भन्यो- अमेरिकासँग वार्ता जारी छ

काठमाडौं । इरानले अमेरिकासँग वार्ता जारी रहेको जनाएको छ । अलजजिराका अनुसार इरानको विदेश मन्त्रालयका प्रवक्ताले पाकिस्तानको मध्यस्थतामा इरान र अमेरिकाबीच संवाद जारी रहेको बताएका छन् । इरानले हालै अघि सारेको प्रस्तावबारे दुवै पक्षले आफ्ना टिप्पणीहरू आदानप्रदान गरिरहेका उनको भनाइ छ ।

पाकिस्तानको मध्यस्थतामा प्रस्ताव, संशोधन तथा परिवर्तन भइरहेका मागहरूको आदानप्रदान अझै जारी रहेको बताइएको छ । इरानले सुरुमा १४ बुँदे रूपरेखा प्रस्ताव गरेको थियो, जसलाई अमेरिकाले अस्वीकार गरेको थियो । त्यसपछि इरानी पक्षले मतभेद कम गर्ने प्रयासस्वरूप संशोधित प्रस्ताव पठाएको जनाएको छ ।