सहिद लखनसँग जोडिएका पालिकाले गरे २३ बुँदे समझदारी, विकास र सेवा प्रवाहमा साझा एजेन्डा बनाउने

पोखरा । गोरखाको सहिद लखन गाउँपालिकालाई केन्द्र मानेर भौतिक पूर्वाधार र अन्य संरचनाको विकास गर्न सँधियार पालिकाहरू सहमत भएका छन् । गोरखा, तनहुँ र चितवनका सीमा जोडिएका ६ स्थानीय तहहरूले विकास निर्माण, सेवा प्रवाह र साझा समस्या समाधानका लागि अन्तरपालिका समन्वय र सहकार्य समझदारी पत्रमा हस्ताक्षर गरेका हुन् ।

बिहीबार बसेको बैठकमा गोरखा नगरपालिका, सहिद लखन गाउँपालिका, भीमसेन थापा गाउँपालिका, गण्डकी गाउँपालिका, चितवनको इच्छाकामना गाउँपालिका र तनहुँको आँबुखैरेनी गाउँपालिकाका प्रमुख तथा प्रतिनिधिहरूले २३ बुँदे समझदारी पत्रमा हस्ताक्षर गरेका छन् । उनीहरुले केही मुख्य सडकहरूमा जोड दिएका छन् ।