सरकारले खाली गरायो नगरकोट र बोडेका होल्डिङ सेन्टर

सरकारले नगरकोट र भक्तपुरको बोडेमा सञ्चालनमा रहेका दुई होल्डिङ सेन्टर खाली गर्दै त्यहाँ आश्रित ४५ सुकुम्बासी परिवारलाई काठमाडौं उपत्यकाका विभिन्न स्थानमा पठाएको छ। सोमबारदेखि यी दुवै होल्डिङ सेन्टर औपचारिक रूपमा खाली गरिएका हुन्।

पूर्वाधार विकास मन्त्रालयअन्तर्गतको अधिकारसम्पन्न बागमती सभ्यता विकास समितिका कर्मचारीहरूले सरकारी सवारीमार्फत नगरकोट र बोडेमा बस्दै आएका सुकुम्बासी परिवारलाई उनीहरूको रोजाइअनुसार कोटेश्वरलगायत विभिन्न स्थानमा पुर्‍याएका छन्। प्रत्येक परिवारलाई २५ हजार रुपैयाँ आर्थिक सहायता पनि उपलब्ध गराइएको छ।