परीक्षामा बरामद करोडौंको मोबाइल नष्ट गरेपछि चौतर्फी आलोचना

सिरहा : एसइई र कक्षा ११, १२ को परीक्षाहरुमा बरामद गरिएका ७ वटा आइफोनसहित ४९६ थान विभिन्न कम्पनीका मोबाइलहरु सिरहामा नष्ट गरिएपछि चौतर्फी आलोचना सुरु भएको छ । जरिवाना गरेर धनीलाई नै फिर्ता वा लिलामी गर्नुपर्ने कुरा उठेको छ । मोबाइलसहित पाँच वटा स्मार्ट वाच पनि बरामद गरिएको थियो ।

सिरहाका प्रमुख जिल्ला अधिकारी सुरेन्द्र पौडेलले अलग तरिकाले काम भएपछि प्रश्न उठ्न स्वभाविक रहेको बताएका छन् । ‘हामी बच्चालाई बढी ध्यानमा राख्यौ । उनीहरुलाई धेरै ठूलो सजाय दिन चाहेनौँ । परीक्षामा अनियमिता हुन्छ भनेर यो जिल्लाको पहिलेदेखि इतिहास जुन थियो । त्यो सन्दर्भमा हामीले अग्रिम व्यवस्था गर्दा गर्दै चिट चोरी भएको पाइयो,’ उनले भने, ‘परीक्षामा अर्मादित क्रियाकलाप गरे ६ महिनासम्म कैद र एक लाख जरिवाना हुने अभियोग हो । त्यसमा प्रयोग हुने सामग्री स्वतः जफत हुन्छ । जफत भइसकेको सामानहरु लिलाम गर्नुपथ्यो । त्यो सही हो ।’