लर्डसमा टिम नेपालले खेल जित्यो, उज्वलले प्रेमीकाको मन

क्रिकेटरहरुको स्वप्न स्थल बेलायतको 'लर्डस मैदान'को प्रेक्षालयमा हजारौं नेपाली दर्शक थिए । टिम नेपाल खेलिरहेको थियो । जब नेपालले विश्वको पुरानो मेरिलेबोन क्रिकेट क्लब, 'एमसीसी'लाई २ सय १७ रन बनाएर उसकोलागि लक्ष्य तय गरिदियो त्यतिबेला नेपाली दर्शकको मुटु नेपालले जित्ला कि नजित्ला भनेर संशयमा धड्किरहेको थियो ।

ठिक त्यति बेला अर्थात् नेपालको ब्याटिङ इनिङ सकिएपछि मध्यान्तरमा लर्ड्स प्रेक्षालय एउटा अप्रत्याशित तर प्रेमील परिघटनामा लुटपुटियो । यही दृष्यमा सबैका आँखा ठोक्किए । लर्डसको एउटा कुनामा बसेका नेपाली युवा उज्वल वैद्यले आफ्नो छेउमा रहेकी एक युवतीलाई भने, ‘म तिमीलाई म आफैलाई भन्दा धेरै माया गर्छु । मेरो देश लर्डसमा खेलिरहेको छ, हामी क्रिकेटको यो डार्लिङ स्थानमा छौं, म तिमीसँग इङ्गेजमेन्ट गर्न चाहन्छु ।’

उज्वलले पकेटबाट टिलिक्क टल्कने औठीं निकाले । युवतीका आँखामा आफ्ना आँखा अड्याउँदै भने, ‘हाम्रा लागि यो भन्दा सुन्दर मौका अरु के हुन सक्छ?’ उज्वलको प्रस्ताव सुनेर चेक रिपब्लिककी युवती इभा साइक्रोभाको वैंशालु अनुहारमा एकै पटक विश्मय र खुशीको अनौठो रङ लतपतियो । लालिमय ओठ मुस्कुराहटले नाच्न थालेको स्पस्ट देख्न सकिन्थ्यो । इभा अाफू बसिरहेको ठाउँबाट उठिन् र चिच्याउँदै भनिन् ‘आइ लभ यु उज्वल, आज तिमीले यो प्रस्ताव राखेर मलाई धन्य तुल्यायौ।’

उज्वल र इभा दुबैले टिम नेपालको जर्सी लगाएका थिए । एक बर्षदेखि प्रेममा रहेको यो जोडीले लर्ड्समा औंठीसँगै सधैं सँगै जिउने बाचा गरिरहँदा अरु दर्शकहरुले ताली बजाएर उनीहरुको प्रेमलाई अनुमोदन गरिरहेका छन् । कोही उनीहरुलाई बधाइ दिँदै थिए । र, कोही उनीहरुसँग सेल्फी लिंदै थिए ।

‘उज्ज्वलले यसरी इन्गेजमेन्टको प्रस्ताव गर्लान् भन्ने मैले सपना पनि सोचिकी थिईन’ खुशीले भावनाको पिङमा मच्चिइरहेकी इभाले नेपालखबरसँग भनिन्, ‘वास्तवमा यो भन्दा गजब मौका अरु हुनै सक्दैनथ्यो । जिन्दगीभर मैले यो दिन बिर्सने छैन ।’ भीडले घेरिएका उज्वललाई अरुसँग हात मिलाउँदै र बधाइ थाप्दैको फुर्सद थिएन । उनी भन्दै थिए, ‘ म लण्डनमा बस्छु, एक बर्षदेखि हामी प्रेममा थियौँ । अब छिट्टै हामी बिहे गर्छौं।’

उज्वलले इभालाई औंठी लगाइदिएपछि यो जोडी निमेषभर अंगालोमा बाधिँएको थियो । वरपर रहेको भीडले फेरि ताली बजाएको थियो । र, उता दोस्रो इनिङमा एमसीसीले ब्याटिङ सुरु गरुन्जेल पनि यो जोडीलाई आशिर्वाद दिनेहरु त्यत्तिकै थिए।

त्यति मात्र होइन, टिम नेपालले पहिलो पटक लर्डसमा खेलेको यो खेल ४१ रनले जित्दा उज्वल र इभाले त एक आपसमा खुशीले चुम्बननै गरेको देखियो । खेल सकिएपछि उज्वलले इभालाई हात समाउँदै प्रेक्षालय बाहिर निकाल्दै थिए । भन्दै थिए, आजको दिन गजब दिन भयो । खेल पनि जितियो, प्रेमीकाको मन पनि जितियो ।’