श्रावणका तुलफुलहरु- बर्खायामको बारी

भनाई नै छ कि भदौमा आँखा फुटेको गोरुले सँधै हरियो देख्छ भनेंर, यो हरियालीको मौसम र बर्खाको ओसहरु बीच आज हामी श्रावणको हरियाली र बारीका तुलफुलहरुको एउटा चित्रकथा प्रस्तुत गर्दैछौं । जाने हैन त बारीका कान्लाहरु चित्र मार्फत ?

यो पनि हेर्नुहोस् : रोपाँईको मेलो

नास्पतीवाट शुरु गरौं आजको बारी यात्रा, नास्पती बर्षामासको एउटा स्वाद हो । पानी, मस्याईलोपना अनि गुलीयोको छरितो स्वाद नास्पातीले बोकेको हुन्छ, हामी सबैले खाएकै छौं ।


अनि कुरा गरौं एउटा सदाबहार तरकारीको, हरेक भान्साको चहक हो बोडी ।
बढ्दै गरेको बोडीका कोसाका त्यान्द्राहरुले स्वागत गरेका बर्खाबहारमा सबैलाई स्वागत छ ।


केराका घरीहरु र बुगों पनि बर्खाको एउटा घोतक हो, हुन त यो फल बर्षैभरि फल्दछ तथापि मालभोक र जहाजी केराको बर्खायाममा बिशेष महत्व हुन्छ ।

मकैका बारी, बढ्दो घोघा अनि कता कता गाढा कालो चिया जस्तो आकाश । पोलेको, भुटेको अनि उसिनेको मकै नेपाली जीवनको एउटा हस्ताक्षर खाजा नै हो ।


कटहरको त के कुरा गर्नु , संभवतः रुखमा फल्ने सबैभन्दा ठुलो फल नै कठहर हो । कटहरको फल र बासना पनि बर्खाको स्वाद सँग मिसीएर आउने गर्दछ ।


अनि घैया धानको हुर्कदै गरेका बिरुवाहरु । एउटा उखान नै छ , एैया बाबै घैया पाक्यो चिउरी कुटाईदेउ भन्ने बहुतै प्रचलीत छ । ससाना बाला अनि गेडाहरु भएको खैरो खैरो रंगको चामल हुने घैया बास्तवमा चिउराकालागि प्रसिद्ध चामल हो है ।

श्रावणको यो महिना बास्तवमै बिशेष छ, बारीका ताजा तस्बिरहरु र नेपाली झझल्कोहरु सहित यि तस्बिरहरु उपहार छ, केवल हाम्रो पात्रोमा ।

सुयोग ढकाल