बालबालिकालाई बाँधेर अमानवीय व्यवहार गर्ने दुई जना पक्राउ

मोरङको उर्लाबारीमा मोबाइल चोरी गरेको आरोपमा दुई जना बालबालिकालाई मन्दिरको फलामे पिलरमा बाँधेर अमानवीय व्यवहार गरिएको घटना सार्वजनिक भएको छ। घटनामा संलग्न रहेको आरोपमा प्रहरीले दुई युवकलाई पक्राउ गरी अनुसन्धान अघि बढाएको छ।

मोरङ प्रहरीका प्रवक्ता डीएसपी सन्तोष श्रेष्ठका अनुसार सोमबार राति करिब ८ बजे उर्लाबारी नगरपालिका–३ स्थित गुरु गोरक्षनाथ मन्दिरमा ७ वर्षीय रवि उराउ र ६ वर्षीया चाँदनी उराउलाई प्लास्टिकको डोरीले हातखुट्टा बाँधिएको अवस्थामा प्रहरीले उद्धार गरेको हो। दुवै जना दाजुबहिनी रहेको प्रहरीले जनाएको छ।