नेपाली महिला कबड्डी टोलीले बङ्गलादेशसँग पाँच खेलको शृङ्खला खेल्ने

काठमाडौँ । नेपाली राष्ट्रिय महिला कबड्डी टोलीले बङ्गलादेशसँग पाँच खेलको शृङ्खला खेल्ने भएको छ । यो शृङ्खला जुलाई १७ देखि २३ तारिखसम्म बङ्गलादेशको ढाकामा आयोजना हुनेछ । नेपाली महिला टोलीले दोस्रो पटक बङ्गलादेशमा शृङ्खला खेल्न लागेको हो । नेपालको महिला टोलीले आगामी २० औँ एसियन गेम्समा पनि चुनौती प्रस्तुत गर्दैछन् ।

एसियन गेम्सका लागि मिसन–२६ मा रहेका सीमित खेलाडी मात्र यो शृङ्खलामा सहभागी छन् । नयाँ खेलाडीलाई एक्सपोजर दिने उद्देश्यले नियमित खेलाडीलाई विश्राम दिएको अखिल नेपाल कबड्डी सङ्घले जनाएको छ । कबड्डी सङ्घका महासचिव अरविन्दकुमार झाले अरू खेलाडीलाई पनि अवसर दिने उद्देश्यले अधिकांश ‘बी’ टोलीका खेलाडीलाई समावेश गरिएको बताए ।