जेनेभामा रहेको नेपाली टोलीको गाभीका प्रतिनिधिसँग भेट, स्वास्थ्य प्रणाली सुदृढीकरणका विषयमा छलफल

विश्व स्वास्थ्य महासभामा सहभागी स्वीटजरल्यान्डको जेनेभा पुगेकी नेपाल सरकारीको स्वास्थ्यमन्त्री निशा मेहता नेतृत्वको टोलीले खोप सञ्जाल ‘गाभी’को टोलीसँग उच्चस्तरीय साइडलाइन भेटवार्ता गरेको छ । यस भेटवार्तामा नेपालको स्वास्थ्य प्रणाली सुदृढीकरण र आगामी दिनको स्वास्थ्य वित्तीय व्यवस्थापनका विषयमा छलफल भएको मन्त्रालयले जनाएको छ ।

सन् २००० यता गाभी नेपालको राष्ट्रिय खोप कार्यक्रमको एक प्रमुख साझेदार रहँदै आएको छ । सन् २०२५ मा नेपालले ऐतिहासिक रूपमा हासिल गरेको ‘रुबेला निवारण’लगायत एचपीभी र अन्य जीवनरक्षक खोपहरूको सफल विस्तारमा गाभीको महत्त्वपूर्ण प्राविधिक तथा वित्तीय भूमिका छ । तर, आगामी सन् २०२६ नोभेम्बरमा नेपाल अतिकम विकसित राष्ट्र (LDC)बाट विकासशील राष्ट्रमा स्तरोन्नति हुने संघारमा रहेको परिप्रेक्ष्यमा यो वार्ताले विशेष रणनीतिक महत्त्व राख्ने दाबी गरिएको छ ।