भोटेकोशी बाढीमा सम्पर्कविहीन इन्जिनियरको खोजीका लागि परिवारको भावुक अपिल

काठमाडौँ । रसुवाको भोटेकोशी नदीमा आएको बाढीपछि सम्पर्कविहीन भएका आफ्ना श्रीमान्को दुई सातासम्म पनि पत्ता नलागेपछि जनकपुरधामकी पूजा साहको चिन्ता र छटपटी दिनप्रतिदिन बढ्दै गएको छ। आफ्ना श्रीमान् अझै जीवित र सकुशल रहेको विश्वासमा रहेकी पूजाले सामाजिक सञ्जालमा इन्जिनियर अजयप्रसाद सिंहलाई लक्षित गर्दै भावुक सन्देश लेखेकी छिन् भने उनीहरूको तत्काल खोज तथा उद्धारका लागि सरकारसँग अपिल गरेकी छिन्।

रसुवास्थित युटी २१६ एमड्ब्लु डूसन पावर हाउसमा कार्यरत सिंह यही भदौ १० गते भोटेकोशीमा आएको बाढीपछि सम्पर्कविहीन भएका हुन्। बाढीपछि सम्पर्कविहीन भएका १३ दिनसम्म पनि कुनै आधिकारिक खबर नआएपछि परिवारजनमा गहिरो चिन्ता छाएको छ। श्रीमान्सँग सम्पर्क हुन नसकेपछि पूजाले “तिमी जहाँ छौ, जस्तो छौ, मलाई खबर गर, म आफैँ आउँछु तिमीलाई लिन। बस, एकपटक तिम्रो आवाज सुन्न र तिमीलाई देख्न पाऊँ” भन्दै भावुक अपिल गरेकी छिन्। साथै, उनकी सानी छोरीसमेत बुबाको भिडियो कल र आवाजको प्रतीक्षामा रहेको उनले दुखेसो पोखिन्।