पूर्वउपरथी डा. खत्रीलाई चिकित्सा शिक्षा आयोगको नेतृत्व, सुधारका कामले गति लिने अपेक्षा

सरकारले चिकित्सा शिक्षा आयोगको उपाध्यक्ष (कार्यकारी प्रमुख) मा पूर्वउपरथी तथा वरिष्ठ चिकित्सक प्रा. डा. देवेन्द्र खत्रीलाई नियुक्त गरेको छ। लामो समयदेखि रिक्त रहेको आयोगको कार्यकारी नेतृत्वमा उनको नियुक्तिसँगै चिकित्सा शिक्षा सुधारका कामले गति लिने अपेक्षा गरिएको छ। पछिल्लो समय आयोग नीतिगत तथा व्यवस्थापकीय चुनौतीसँग जुधिरहेको अवस्थामा नयाँ नेतृत्वबाट सुधारको अपेक्षा गरिएको हो।

चिकित्सा शिक्षा आयोगको उपाध्यक्षको भूमिका केवल प्रशासनिक नेतृत्वमा सीमित हुँदैन। आयोगले सञ्चालन गर्ने एमबीबीएस, बीडीएस, नर्सिङलगायत स्वास्थ्य शिक्षा कार्यक्रमका प्रवेश परीक्षा, विद्यार्थी भर्ना, छात्रवृत्ति व्यवस्थापन, मेडिकल कलेजको नियमन, सिट निर्धारण तथा गुणस्तर सुनिश्चित गर्ने कार्यमा उपाध्यक्षले प्रत्यक्ष नेतृत्व गर्नेछन्।