सङ्खुवासभा कैदी हत्या प्रकरण: सात प्रहरीसहित १५ जनालाई जन्मकैदको फैसला

काठमाडौँ । सङ्खुवासभाको जिल्ला कारागार खाँदबारीमा दुई जना कैदीको कुटपिट गरी हत्या गरिएको घटनामा अदालतले १५ जनालाई जन्मकैदको फैसला सुनाएको छ। जिल्ला अदालत सङ्खुवासभाका न्यायाधीश राजकुमार कोइरालाको इजलासले मुलुकी अपराध संहिता २०७४ को दफा १७१ (१) बमोजिमको कसुरमा सात जना प्रहरीसहित १५ जनालाई जन्मकैदको सजाय सुनाएको जिल्ला अदालतका श्रेस्तेदार उज्वल न्यौपानेले जानकारी दिए।

यसका साथै अदालतले सोही संहिताको दफा १८६ बमोजिम प्रतिवादीहरूबाट जनही ५० हजार रुपैयाँका दरले मृतक विनोद तोलाङ्गी र आकाश बलामीका नजिकका हकदारलाई क्षतिपूर्ति भराउने ठहरसमेत गरेको छ।