मतियार ठहर बालकृष्ण खाणको राजनीतिक जीवनमा लाग्न सक्छ 'पूर्णविराम'

काठमाडौँ । नक्कली भुटानी शरणार्थी प्रकरणमा काठमाडौँ जिल्ला अदालतले पूर्वगृहमन्त्री बालकृष्ण खाणलाई 'ठगी र संगठित अपराध' मा सहयोगी (मतियार) को रूपमा दोषी ठहर गरेपछि उनको राजनीतिक भविष्यमाथि प्रश्न उठेको छ ।

अदालतको यो फैसलाले बालकृष्ण खाणको राजनीतिक जीवन र प्रतिष्ठामा आँच आउन सक्ने देखिन्छ । अदालतको यो फैसलाले उनलाई आउँदो प्रतिनिधिसभा निर्वाचन लड्नबाट बञ्चित गर्न सक्ने देखिन्छ । नेपालको 'प्रतिनिधिसभा सदस्य निर्वाचन ऐन, २०७४' अनुसार नैतिक पतन देखिने फौजदारी कसुरमा सजाय पाएको व्यक्ति कहिल्यै पनि निर्वाचन लड्न पाउँदैन । ठगी र संगठित अपराधलाई 'नैतिक पतन' मानिन्छ।