कर्णालीको उत्पादनदेखि सडकसम्म बजेट मौन : सांसद रोकाय

काठमाडौँ। नेपाली कांग्रेसका सांसद जयपति रोकायले सरकारले ल्याएको आगामी आर्थिक वर्षको बजेटले हुम्ला र समग्र कर्णाली प्रदेशको सम्भावना तथा आवश्यकतालाई पर्याप्त रूपमा सम्बोधन गर्न नसकेको बताएका छन्।

मंगलबार प्रतिनिधिसभाको बैठकमा बोल्दै उनले हुम्लाको हिल्सामा पशु क्वारेन्टाइन स्थापना गर्ने व्यवस्था गरिएकोमा सरकारलाई धन्यवाद दिए। तर, क्वारेन्टाइन स्थापना मात्रै पर्याप्त नभएको भन्दै त्यसलाई कर्णालीका उत्पादनको व्यवसायीकरण र निर्यातसँग जोड्ने स्पष्ट नीति तथा कार्यक्रम बजेटमा नदेखिएको बताए।