मन्त्री लम्साललाई सांसद बासनाको प्रश्न - जिम्मेवारीमा बसेर भौतिक कारबाही गर्छु भन्ने ?

नेपाली कांग्रेसकी प्रमुख सचेतक बासना थापाले संसदीय समितिहरू सक्रिय रूपमा सञ्चालन भइरहे पनि समितिको गरिमा र संसद्को प्रतिष्ठा अपेक्षाअनुसार कायम हुन नसकेको बताएकी छन्।

संसद् भवन परिसरमा सञ्चारकर्मीसँग कुरा गर्दै उनले समितिका बैठकमा मन्त्रीहरूको अनुपस्थिति र सांसदहरूले उठाएका प्रश्नको पर्याप्त जवाफ नपाइने अवस्थाप्रति असन्तुष्टि व्यक्त गरिन्। सांसदहरूले विभिन्न विषयमा पटक–पटक प्रश्न उठाए पनि सम्बन्धित मन्त्रीहरूबाट अपेक्षित जवाफ प्राप्त हुन नसकेको उनको भनाइ थियो। थापाले दुई तिहाइको जनादेशसहित गठन भएको सरकारले प्रस्तुत गरेको बजेट पुरानै कार्यक्रमलाई सामान्य परिमार्जन गरी ल्याइएको जस्तो देखिएको टिप्पणी गरिन्। स्वास्थ्य, शिक्षा तथा पूर्वाधार क्षेत्रका बजेटहरू मुख्यतः सहर केन्द्रित रहेको उल्लेख गर्दै उनले ग्रामीण तथा दुर्गम क्षेत्रका आवश्यकतालाई पर्याप्त रूपमा सम्बोधन गर्न नसकेको बताइन्।