जलाइएको भवनअगाडि उभिएर सुधन गुरुङ : भाषण होइन, सुशासनको सपना पूरा गर्न आएका हौँ

काठमाडौं- गृहमन्त्री सुधन गुरुङले आफूहरू कुनै ठूला भाषण गर्न नभई जनताको आशा र सुशासनको सपना पूरा गर्न सरकारमा आएको बताएका छन् । नयाँ बानेश्वरस्थित पुरानो संसद भवनमा आयोजित जेन-जी सहिद दिवसको अवसरमा आयोजित कार्यक्रमलाई सम्बोधन गर्दै उनले सडक संघर्षमा आफ्ना साथीहरूले बगाएको रगत र दिएको बलिदान अझै पनि ताजै रहेको बताए ।

सहिदका परिवार तथा घाइतेहरूप्रति उत्तरदायी रहँदै उनले आफूलाई मन्त्रीका रूपमा भन्दा पनि सहिद परिवारको आफ्नै छोरा, भाइ वा दाइका रूपमा हेर्न आग्रह गरे । नागरिकको आशा र विश्वासमा कुनै कमी आउन नदिने र आफूले पाएको जिम्मेवारीलाई इमानदारीका साथ पूरा गर्ने प्रतिबद्धता उनले व्यक्त गरे ।