टर्कीलाई एफ–३५ बेच्ने अमेरिकी योजनाको नेतन्याहूले गरे विरोध

वासिङ्टन डीसी । इजरायलका प्रधानमन्त्री बेन्जामिन नेतन्याहूले अमेरिकाले टर्कीलाई अत्याधुनिक एफ–३५ स्टेल्थ लडाकु विमान बेच्ने सम्भावित निर्णयको विरोध गरेका छन् । तर अमेरिकी राष्ट्रपति डोनाल्ड ट्रम्पसँग यस विषयमा कुनै गम्भीर मतभेद नरहेको उनले दाबी गरेका छन् । सीएनएनसँगको अन्तर्वार्तामा नेतन्याहूले टर्कीलाई एफ–३५ उपलब्ध गराइए पश्चिम एशियाको शक्ति सन्तुलन बिग्रिने चेतावनी दिए । उनले टर्कीका राष्ट्रपति रेचेप तैय्यिप एर्दाेआनको नेतृत्वलाई आलोचना गर्दै टर्की अहिले अमेरिकाको आदर्श सहयोगी राष्ट्र नभएको टिप्पणी गरे ।

टर्कीको वर्तमान शासन मुस्लिम ब्रदरहुडको विचारधाराबाट प्रभावित रहेको आरोप पनि नेतान्याहूले लगाए । उनका अनुसार एर्दाेआनले इजरायललाई नष्ट गर्ने धम्की दिँदै आएकोले टर्कीलाई यस्तो सैन्य क्षमता दिनु क्षेत्रीय शान्तिका लागि जोखिमपूर्ण हुन सक्ने उनी भन्छन् । आफूले राष्ट्रपति ट्रम्पलाई प्रत्यक्ष रूपमा पनि टर्कीलाई एफ–३५ नबेच्न आग्रह गरेको उनले बताए । उनका अनुसार यस्तो बिक्रीले मध्यपूर्वको सैन्य शक्ति सन्तुलनलाई गम्भीर असर पार्नेछ ।