महासंघको आपतकालीन राहतकोषमा कोषाध्यक्ष लकान्द्रीद्वारा ५१ हजार ५११ सहयोग

काठमाडौं– नेपाल सुनचाँदी रत्न तथा आभूषण महासंघका कोषाध्यक्ष गणेश लकान्द्रीले महासंघद्वारा स्थापित आपतकालीन राहतकोषमा रु ५१ हजार ५११ आर्थिक सहयोग गरेका छन् । रसुवा जिल्लाको भोटेकोशी नदीमा आएको विनाशकारी बाढीबाट प्रभावित परिवारहरूको उद्धार, राहत तथा पुनर्स्थापनामा सहयोग पुर्‍याउने उद्देश्यले उनले उक्त रकम प्रदान गरेका हुन् ।

भोटेकोशी नदीमा आएको भीषण बाढीका कारण रसुवा, नुवाकोट, धादिङलगायत नदी तटीय क्षेत्रमा ठूलो मानवीय तथा भौतिक क्षति भएको छ । विपद् प्रभावित नागरिकलाई तत्काल राहत उपलब्ध गराउन विभिन्न संघसंस्था, व्यवसायी तथा व्यक्तिहरूले सहयोग अभियान सञ्चालन गरिरहेका छन् । सोही क्रममा महासंघले पनि आपतकालीन राहतकोष स्थापना गरी प्रभावित नागरिकको सहयोगमा जुटेको हो ।