इन्डोनेसियाको फोहोरको पहाडमा आठ दिनदेखि आगलागी, विषाक्त धुवाँका कारण सयौँ विस्थापित

जकार्ता । इन्डोनेसियाको राजधानी जकार्ता नजिक रहेको जातिवारिङ्गिन ल्यान्डफिलमा आठ दिनदेखि भीषण आगलागी जारी रहेको छ । गत जुन ३० मा सुरु भएको आगलागी अहिले १५ हेक्टरभन्दा बढी क्षेत्रमा फैलिएको छ । बाक्लो विषाक्त धुवाँले आसपासका बस्ती ढाकिएपछि सयौँ स्थानीय बासिन्दा विस्थापित भएका छन् । फोहोरको थुप्रोमुनि जमेको मिथेन ग्यासका कारण आगो लागेको अनुमान गरिएको छ ।

वायु प्रदूषणका कारण श्वासप्रश्वाससम्बन्धी बिरामीको संख्या उल्लेखनीय रूपमा बढेको स्वास्थ्य अधिकारीहरूले बताएका छन् । आगो नियन्त्रणका लागि अग्निनियन्त्रकहरूले हेलिकप्टर, पानी ट्याङ्कर, बुलडोजर तथा ड्रोन परिचालन गरेका छन् । अधिकारीहरूले यसै साताको अन्त्यसम्म आगो नियन्त्रणमा आउने आशा व्यक्त गरेका छन् । तर वातावरणविद्हरूले यो घटना इन्डोनेसियामा बढ्दो फोहोर व्यवस्थापन संकटको एउटा उदाहरण मात्र भएको बताएका छन् । उनीहरूले यसलाई प्रणालीगत लापरबाहीबाट सिर्जिएको पर्यावरणीय विपत्तिको संज्ञा दिएका छन् ।