फुटबल, साना देश, साँघुरो सोच र सामाजिक रूपान्तरण

यो हप्ता नेपालीहरूको आँखामा अनिश्चय, अनिदो र अनेक भावनाहरूको मिश्रण पढ्न सक्नुहुनेछ—विश्वका फुटबल प्रेमीहरूको जस्तै । जब विश्वकप आरम्भ हुन्छ, तब सिङ्गो नेपाल लगभग दुई कित्तामा विभाजित हुन्छ– ब्राजिल वा अर्जेन्टिनामा । साना–साना अंश मात्रै जर्मनी, फ्रान्स वा यस्तैतिर सहानुभूतिशील हुन्छन् । डेभिड बेकह्यामसँगै बेलायती फ्यानहरू हराए, अर्कोतिर बहकिए । नभए कुनै समय त्यस्तो जमाना थियो कि यो देशमा बेकह्याम टिसर्टको ठुलो बजार थियो ।

बाजी, अनुमान र अड्कलको दुनियाँमा त हामी अरूभन्दा कत्ति पनि कम छैनौँ । फुटबल जितका पक्ष–विपक्षमा यथेष्ट बाजीगतहरू छौँ हामी, जो वास्तविक खेलाडीहरूको देशमा जस्तै उत्सवीय मेला र निराशाका बादलहरू यहाँ सँगै मडारिन्छन् । कहिलेकाहीँ त यस्तो लाग्छ कि म जस्तो तटस्थ न खेलमा काम लाग्छ न राजनीतिमा ! कस्तो बेकम्मा भइएछ ।