होल्डिङ सेन्टरका सुकुम्बासीलाई गाँस-बासको व्यवस्था गर्न रुलिङको माग

काठमाडौँ। प्रतिपक्ष दल नेपाली कम्युनिष्ट पार्टी (नेकपा) का सांसद परशुराम तामाङले होल्डिङ सेन्टरमा रहेका सुकुमवासी नागरिकहरूलाई तत्काल गाँस र बासको व्यवस्था गर्न सरकारका नाममा रुलिङ जारी गर्न सभामुख डोलप्रसाद अर्यालसँग माग गरेका छन्।

होल्डिङ सेन्टरमा आश्रय लिइरहेका नागरिकहरूका लागि गाँस, बास र कपासको समेत उचित व्यवस्था नभएको पीडादायी खबरहरू सार्वजनिक भइरहेका बेला बुधबार बसेको प्रतिनिधि सभाको दोस्रो बैठकमा बोल्दै सांसद तामाङले यस्तो माग गरेका हुन्। सरकारले सुकुमवासीहरूलाई सम्मानपूर्वक जिउन पाउने गरी आधारभूत आवश्यकताहरूको तत्काल व्यवस्था गर्नुपर्नेमा उनले जोड दिए। सुकुमवासी बस्ती भत्काएर नागरिकलाई बिचल्लीमा पार्ने सरकारको नियतप्रति उनले कडा आपत्ति जनाए।