६६ मेगावाट क्षमताको तिप्लाङ कालीगण्डकी जलविद्युत आयोजना निर्माण प्रक्रिया अगाडि बढाउँदै आइएमई ग्रुप

नेपालको स्वच्छ ऊर्जा र आर्थिक समृद्धिको यात्रालाई थप मजबुत बनाउँदै, आइएमई ग्रुपले जलविद्युत विकासप्रतिको आफ्नो प्रतिबद्धतालाई अझै फराकिलो र सशक्त बनाएको छ । नेपाल जलस्रोतका दृष्टिले विश्वकै धनी राष्ट्रहरूमध्ये एक हो । अध्ययनहरूका अनुसार नेपालमा करिब ८३ हजार मेगावाट जलविद्युत उत्पादनको सैद्धान्तिक सम्भावना रहेको छ, जसमध्ये झन्डै आधाभन्दा बढी उत्पादन आर्थिक तथा प्राविधिक रूपमा सम्भाव्य मानिन्छ । यस्तो अपार सम्भावनालाई राष्ट्रको समृद्धिसँग जोड्ने उद्देश्यका साथ आइएमई ग्रुपले ऊर्जा क्षेत्रमा निरन्तर लगानी गर्दै आएको छ । हाम्रो विश्वास छ—नेपालको आर्थिक रूपान्तरण, औद्योगिक विकास र दीर्घकालीन समृद्धिको आधार स्वदेशी जलविद्युत नै हो।

यस यात्रामा हामीले महत्वपूर्ण उपलब्धिहरू हासिल गरेका छौं। यसअघि हामीले लमजुङ जिल्लामा २७ मेगावाट क्षमताको दोर्दी खोला जलविद्युत आयोजना तथा म्याग्दी जिल्लामा ४२ मेगावाट क्षमताको मिस्त्री खोला जलविद्युत आयोजना सफलतापूर्वक निर्माण गरी व्यावसायिक उत्पादन सुरु गरिसकेका छौं। यी आयोजनाहरूले राष्ट्रिय विद्युत प्रणालीमा स्वच्छ ऊर्जा थप्नुका साथै स्थानीय स्तरमा रोजगारी, पूर्वाधार विकास तथा आर्थिक गतिविधि विस्तारमा समेत महत्वपूर्ण योगदान पुर्याएका छन्।