आयरल्याण्डमाथि इंग्ल्याण्डको सहज जित

साउथह्याम्पटनमा वर्षाका कारण केही ढिलो गरी सुरु भएको खेलमा इंग्ल्याण्डले आयरल्याण्डलाई चार विकेटले पराजित गर्दै टी–२० विश्वकपमा आफ्नो लगातार दोस्रो जित दर्ता गरेको छ । आयरल्याण्डले दिएको ११९ रनको सामान्य लक्ष्यलाई इंग्ल्याण्डले १५ बल बाँकी छँदै ६ विकेट गुमाएर पूरा गर्‍यो । इंग्ल्याण्डको जित सहज देखिए पनि खेलको अन्त्यतिर कप्तान नेट सिभर–ब्रन्ट घाइते भएर मैदान बाहिरिएकी थिइन् ।

जितका लागि मात्र ९ रन आवश्यक भएको अवस्थामा बायाँ पिँडुलाको पुराना चोट बल्झिएपछि उनले मैदान छाडेकी थिइन् । उनले ३७ बलमा ४८ रनको उत्कृष्ट इनिङ खेलिन् । इसिबीले उनलाई सावधानीका लागि ‘रिटायर्ड हर्ट’ गराएको बताए पनि म्याच अफिसियलहरूले भने टी–२० विश्वकपको इतिहासमै पहिलोपटक उनलाई आधिकारिक रूपमा ‘रिटायर्ड आउट’ को रूपमा उल्लेख गरेका छन् ।