विदेशी सम्बन्धनका कलेजमा थप कडाइ, क्याबिनेटले पारित गरेको नयाँ नियमावलीमा के–के छ ?

मन्त्रिपरिषद्को बुधबारको बैठकले गरेका आठवटा निर्णयमा तेस्रो बुँदामा छ– 'विदेशी शैक्षिक कार्यक्रम (सञ्चालन र नियमन) नियमावली, २०८३' लाई स्वीकृत गर्ने । यो निर्णयले विदेशी विश्वविद्यालयसँग सम्बन्धन लिएर नेपालमा चलेका कलेजहरू प्रभावित हुने भएका छन् । पछिल्ला वर्षमा नेपालमा विदेशी विश्वविद्यालयबाट सम्बन्धन लिने कलेजहरूको होडबाजी चलेको थियो । अनौचारिक तथ्यांकअनुसार त्यसरी विदेशी विश्वविद्यालयबाट सम्बन्धन लिएका कलेजमा भर्ना हुने विद्यार्थीको संख्या ५० हजारभन्दा बढी रहेको छ ।

सरकारले विदेशी शैक्षिक कार्यक्रम सञ्चालन गर्ने नयाँ नियमावलीले ती कलेजमा कडाइ हुने भएको छ । नयाँ नियमावलीसँग तय भएका नयाँ मापदण्डले निश्चित मापदण्ड पूरा गरेका विश्वविद्यालयबाट मात्रै सम्बन्धन लिन पाउने भएका छन् । विगतमा जुनसुकै विश्वविद्यायबाट पनि सम्बन्धन लिने गरिएको थियो ।