बोल्सोनारोका छोरालाई जेल सजाय, अमेरिकासँग सहयोग खोजेको आरोप

रियो दि जेनरियो । ब्राजिलको सर्वोच्च अदालतले पूर्वराष्ट्रपति जाइर बोल्सोनारोका छोरा एडुआर्डाे बोल्सोनारोलाई चार वर्ष दुई महिनाको जेल सजाय सुनाएको छ । आफ्नो बुबाको कानुनी लडाइँमा सहयोग जुटाउन अमेरिकी प्रशासनमाथि दबाब सिर्जना गरेको आरोपमा दोषी ठहर गर्दै उनलाई सो सजाय दिइएको हो । ४१ वर्षीय एडुआर्डाेमाथि गत वर्ष अमेरिकी अधिकारीहरूसँग लबिङ गर्दै ब्राजिलमाथि अतिरिक्त भन्सार महसुल (ट्यारिफ) वा प्रतिबन्ध लगाएर भएपनि आफ्ना बुबालाई सहयोग दिन खोजेको आरोप लगाइएको थियो ।

ब्राजिलका पूर्वसांसद एडुआर्डाे सन २०२५ मा अमेरिका सरेका थिए । उनका बुबा जाइर बोल्सोनारोलाई सैनिक कूको योजना बनाएको अभियोगमा दोषी ठहर गर्दै २७ वर्षको जेल सजाय सुनाइएको थियो । बोल्सोनारो जनवरी २०१९ देखि डिसेम्बर २०२२ सम्म ब्राजिलका राष्ट्रपति थिए । मंगलबार सामाजिक सञ्जालमार्फत प्रतिक्रिया दिँदै एडुआर्डाेले आफूविरुद्धको फैसला आधारहीन र निरर्थक भएको बताएका छन् । उनले न्यायाधीशहरू आफूलाई भविष्यमा चुनाव लड्नबाट रोक्न चाहेको आरोप पनि लगाए ।