जनश्रमदानबाट हिलाम्मे सडक सरर

खोटाङको साकेला गाउँपालिकाले लगातार १० दिनसम्म श्रमदान गरेर हिलाम्य सडक सरर चल्ने बनाएको छ। वर्षदिनयता श्रमदान अभियानमा विभिन्न सडक, विद्यालय तथा अन्य सार्वजनिक स्थलहरूको सरसफाइ तथा मर्मत कार्य गर्दै आएको साकेला गाउँपालिकाले पुष्पलाल मध्यपहाडी लोकमार्गअन्तर्गत साकेला गाउँपालिकाभित्र पर्ने सडकको उक्त दिनसम्म मर्मत कार्य गरेको हो।

ठेकेदार कम्पनीको लापरबाहीका कारण वर्षाौँदेखि अलपत्र बनेको मध्यपहाडी लोकमार्गअन्तर्गत साकेला गाउँपालिका–१ को सेखुवा–चखेवाभन्ज्याङ खण्डको सडक श्रमदानबाट सुचारु हुने अवस्थामा पुगेको छ। गाउँपालिका अध्यक्ष रविप्रकाश राई स्वयं नेतृत्व गर्दै श्रमदानमा खटेपछि स्थानीयवासी, जनप्रतिनिधि, कर्मचारी र प्रहरीसमेत सहभागी हुने गरेका छन्।