नागरिक उड्डयन प्राधिकरणको प्रक्रियामा ‘स्वार्थ बाझिने’ आशंका: महानिर्देशक छनोटमै निष्पक्षतामाथि प्रश्न

नेपाल नागरिक उड्डयन प्राधिकरणको महानिर्देशक छनोट प्रक्रियाको निष्पक्षता, पारदर्शिता र विश्वसनीयतामाथि गम्भीर प्रश्न उठेको छ। छनोट समितिमा संलग्न भनिएका विज्ञ तथा अन्तर्वार्ताकार सुधिप भट्टराई र सोही पदका आवेदक मुकेश डंगोलबीच रहेको निकट कार्यगत सम्बन्धका कारण सम्पूर्ण छनोट प्रक्रिया नै विवादको घेरामा परेको हो।

सरोकारवालाहरूले नागरिक उड्डयनजस्तो संवेदनशील नियामक निकायको नेतृत्व चयन गर्दा मूल्याङ्कनकर्ताको स्वतन्त्रता, निष्पक्षता र स्वार्थ बाझिने अवस्थाबारे स्पष्ट मापदण्ड लागू हुनुपर्ने बताएका छन्। कुनै विज्ञ वा अन्तर्वार्ताकार र उम्मेदवारबीच पूर्वकार्यगत सम्बन्ध, संस्थागत पहुँच, नियमित सम्पर्क वा पेशागत सहकार्य रहेको अवस्थामा निष्पक्ष मूल्याङ्कनमाथि स्वाभाविक रूपमा प्रश्न उठ्ने उनीहरूको भनाइ छ।